Ժամանակահատված: 1 հունվար 2026 — 31 հոկտեմբեր 2026
Դոնոր կազմակերպություն: Digital Defenders Partnership (DDP)
Իրականացնող կազմակերպություն: Բազմակողմանի տեղեկատվության ինստիտուտ
Այս ծրագրի նպատակն է արձագանքել Հայաստանի թվային անվտանգության հրատապ մարտահրավերներին՝ վերհանված խնդիրները վերածելով կոնկրետ և չափելի նպատակների։ Հիմնվելով չորս հիմնական մարտահրավերների վրա՝ կիբեռանվտանգության սպառնալիքներ, կարողությունների պակաս, ատելության խոսքի ու թիրախավորման աճ և հանրային իրազեկվածության ցածր մակարդակ, ծրագիրը կտրամադրի գործնական աջակցություն, կհզորացնի դիմակայունությունը և կնպաստի քաղաքացիական հասարակության կազմակերպությունների (ՔՀԿ), մարդու իրավունքների պաշտպանների (ՄԻՊ) և նրանց համայնքների համար առավել անվտանգ թվային տիրույթների ձևավորմանը:
Նպատակ 1. Հզորացնել ռիսկի խմբում գտնվող ՔՀԿ-ների և ՄԻՊ-ների կիբեռանվտանգության դիմակայունությունը
Մենք կտրամադրենք թվային անվտանգության անհատականացված աջակցություն 12 ՔՀԿ-ների և 40 ՄԻՊ-ների, ովքեր առավել խոցելի են կիբեռհարձակումների և թվային հալածանքների նկատմամբ: Հաշվի առնելով 2026թ. ընտրություններին ընդառաջ ատելության խոսքի և թվային թիրախավորման բարձր ռիսկերը՝ ծրագիրը կաջակցի ՔՀԿ-ներին և ՄԻՊ-ներին՝ հզորացնելու արդյունավետ արձագանքման իրենց կարողությունները:
Նպատակ 2. Նվազեցնել թվային անվտանգության գիտելիքների և հմտությունների պակասը
Թվային սպառնալիքների արագ փոփոխվող լանդշաֆտին արձագանքելու համար ծրագիրը կիրականացնի կարիքների վրա հիմնված դասընթացներ 25 ՄԻՊ-ների համար: Այս դասընթացները կթիրախավորեն ռիսկերի գնահատման և խորհրդատվությունների միջոցով վերհանված բացերը՝ ընդգրկելով կարևորագույն ոլորտներ:
Նպատակ 3. Բարձրացնել հանրային իրազեկվածությունը թվային ռիսկերի և լուծումների վերաբերյալ
Ազդեցության շրջանակն ընդլայնելու նպատակով ծրագիրը կհրապարակի 10 բլոգային նյութ՝ նվիրված թվային հիմնական ռիսկերին, նորահայտ մարտահրավերներին և գործնական լուծումներին:
