Ժամանակահատված: 10 մայիս 2025 — 9 մայիս 2026
Դոնոր կազմակերպություն: Արամինտա gUG (Գերմանիա)
Իրականացնող կազմակերպություն: Բազմակողմանի տեղեկատվության ինստիտուտ
Գործընկեր կազմակերպություն: Արամինտա (Բեռլին), Ժողովրդավարության զարգացման հիմնադրամ (Հայաստան)
Մեկամյա այս նախաձեռնությունը նպատակ ունի բարելավել տվյալների պաշտպանության չափանիշները և իրավական համապատասխանությունը Հայաստանում՝ Տվյալների պաշտպանության հարցերով մասնագիտացված իրավաբանի ներգրավման միջոցով: Ծրագիրը Բազմակողմանի տեղեկատվության ինստիտուտի (MDI), «Ժողովրդավարության զարգացման հիմնադրամի» (DDF) և բեռլինյան Araminta ՀԿ-ի համատեղ ջանքն է: Այն աջակցում է Հայաստանի առաջընթացին՝ ԵՄ տվյալների պաշտպանության չափանիշներին համապատասխանեցման գործում, հատկապես Հայաստան-ԵՄ վիզաների ազատականացման գործընթացի լայն համատեքստում:
Տվյալների պաշտպանության իրավաբանը հանդես կգա որպես ներդրված փորձագետ՝ մշտադիտարկելով իրավական զարգացումները, գնահատելով համապատասխանությունը տեղական և միջազգային կանոնակարգերին և տրամադրելով գործնական իրավական առաջարկություններ: Հիմնական ուշադրությունը կկենտրոնացվի Հայաստանի գործող տվյալների պաշտպանության օրենքի կիրառման հզորացմանը, թերությունների վերհանմանը և անհրաժեշտության դեպքում օրենսդրական բարեփոխումների նախագծմանը: Դերը ներառում է նաև խորհրդատվություն անձնական տվյալների օրինական մշակման վերաբերյալ, տվյալների պաշտպանության քաղաքականության մշակում և արձագանքում տվյալների արտահոսքին՝ փորձագիտական ուղղորդման և կանխարգելիչ ռազմավարությունների միջոցով:
Բացի ուղղակի իրավական աջակցությունից, ծրագիրը կարևորում է կարողությունների հզորացումը թե՛ քաղաքացիական հասարակության կազմակերպությունների (ՔՀԿ), թե՛ պետական դերակատարների համար: Իրավաբանը կկազմակերպի և կիրականացնի անհատականացված դասընթացներ, կպատրաստի իրավական կարծիքներ և քաղաքականության վերաբերյալ փաստաթղթեր, կհամագործակցի կարգավորող մարմինների հետ և կխորհրդակցի հիմնական շահագրգիռ կողմերի հետ՝ թափանցիկությունն ու հաշվետվողականությունը խթանելու նպատակով: Հատուկ ուշադրություն կդարձվի քաղաքականության ջատագովության մեջ ՔՀԿ-ների ներգրավվածության ընդլայնմանը՝ նպաստելով Հայաստանում ժողովրդավարական զարգացման ավելի լայն օրակարգին: Ծրագրի գործընկերները համագործակցում են Եվրոպայի խորհրդի Տվյալների պաշտպանության հանձնակատարի և այլ միջազգային փորձագետների հետ՝ կարողությունների հզորացման ուղղությամբ:
